قصة رعب شبح المرآه

شبح المرآه قصة رعب حقيقية حدثت في مصر 

ما أصعب أن تواجه موقف رعب حقيقي فتجد أمامك شبحا أو عفريت يرعبك ويسود حياتك ، فيخرج من المرآة المعلقة على جدار غرفتك ليلا ، فماذا ستفعل وقتها هل ستتحدى العفريت يا أخي ، أم ستفر هاربا إن الموضوع صعب ولكنه يحتاج منك إلى إجابه ، فالشبح خلفك وأنت تريد الهروب ولكنك لا تستطيع فقدماك مثبته بفزع في الأرض وشريط حياتك يمر أمام عينيك ، أقدم لكم اليوم في موقع قصة كتابي بعنوان قصة رعب مفزعة حدثت في مصر  بعنوان شبح المرآة كتابه يوسف عامر .

قصص حقيقية على لسان أصحابها باللهجة المصرية

صديقتنا بتحكي قصتها وتقول برعب ،يومها كنت قاعدة اذاكر على السرير اليوم دا ، كانت الساعة عدت نصف الليل بشوية ، كنت خايفة اووى كان عندي امتحان مهم تاني يوم في الكليلة، كان امتحان ميدترم والدكتور كان رجل ثقيل اووى  ورخم ربنا يهديه ، كان مزاجة يسقط نصف الدفعة ويشيلهم المادة ، محدش يقلي ليه اهو في دكتره كدة غاوية شكل وشر ربنا ينتقم منهم ،  المهم انا كنت بذاكر  ومركزة  اووى المادة دي صعبه وبحاول افهم  اي حاجة يمكن ربنا يسهلها واحل حاجة في الامتحان .

بس طبعا كالعادة مش فاهمة حاجة ، بس اهو أي كلمتين وخلاص نحفظهم ، وقتها امي  الله يكرمها عملتلي كوباية شاي ودخلت نامت بعدها ، اختي الصغيرة نايمة على السرير التاني بالاوضة  كانت نايمه قصادي ، وكل شيء عادي  ومفيش حاجة وانا عماله اكل في ضوافيري واذاكر ، ومعرفش في ايه مرة واحدة  لقيت اختي الصغيرة  صحيت  من النوم  مرة واحدة وقعدت على السرير ،  وعمالة تبصلي  بطريقة غريبة اووى .

وبعدها اعدت تبص للمرايا اللي قصادي  في الاوضة ، وبعدين  اختى الصغيرة قامت من على السرير  مرة واحدة من غير متتكلم ، وراحت  وقفت قدام مراية التسريحة وهي بتبص بتعجب وتغمض عينيها وتفتحها جامد ، وقربت من المرايا  اوي وعمالة تبص جامد وتفتح عنيها  وتحسس على المرايا  ، وكانها هتدخل جوه المرايا معرفش ليه اتوترت جامد وحسيت بالخوف من نظرات الغبية دي .

قولتلها في ايه يا بنتي مالك ، اختى بصتلي كدة وقالتلي هي الست اللي كانت واقفة وراكي ولابسة اسود دخلت المرايا ازاي يا رانا ، انا بصتلها كدة وقلتلها انتي بتقولي ايه ، كررت كلامها تاني وقالتلي الست العجوزة اللي لابسة اسود اللي كانت واقفة وراكي على الحيطة دخلت المرايا ازاي .

انا قلبي كان هيقف وقلتلها انتي باين عليكي كنت بتحلمى نامي انا عندى امتحان اختى اعدت تكرر كلامها ورعبتنى وخلتني اخاف فعلا ، اعدت تبص تاني للمرايا وبعدها دخلت نامت وهي بتهز راسها بعدم فهم .

انا كنت هموت من الرعب عاوزة اذاكر بس خايفة اووى من كلام اختي يكون صحيح وفي عفريت معايا بالاوضة ، كنت حاسة اني متثبته في الأرض ومش قادرة اتحرك من الرعب والخوف غير اني حاسة ان الدنيا ساقعة اووى وفي هوا بارد بالأوضة ، كان احساس صعب اووى معرفش الهوا دا كان  جي منين بس انا خايفة وقلبي هيقف ،  قربت من المرايا كتير  برعب واعدت ابص  جامد مفيش حاجة بالمرايا  كنت شايفة انعكاس الصورة اللي متعلقة على الحيطه ورايا ، معرفش انا بتهيلي ولا حصل الصورة اتحركت ومرة واحدة الصورة اللي كانت متعلقة على الحيطة وقعت لوحدها على الارض واتكسرت  بصوت عالي .

انا صرخت بفزع واعدت اصوت  واصوت ومش قادرة اتحرك من مكاني زى مكون اتشلت  ولا اقدره اتنفس ، امي صحيت  بفزع على صوتي وصويتي قالتلي في ايه قولتلها اللي حصل ، امي قالتلي اكيد اختك كانت بتحلم والصورة وقعت قدرا بالصدفة روحي نامي عندك امتحان بكرة ، انا مكنتش مصدقة صورة ايه اللي هتقع قدرا شغلت قران كريم على الراديو ودخلت نمت ، والصبح بابا قال نفس كلام ماما ان اختى كانت بتحلم واختى الفقرية كانت مصرة ان في واحدة عجوزه كانت واقفة ورايا وانا بذاكر ودخلت المرايا وعاوزه تعرف ازاي عملتها وازاي حد يقدر يدخل جوه المرايا ويعيش فيها ، ماما زعقتلها وقالتلها متقوليش الكلام دا تاني واخرسي انتى كنتي بتحلمي .

ومن يومها حرمت اذاكر بالليل  ومقدرش انام الا واذاعة القران الكريم شغاله ، وطبعا سقطت في المادة هو دكتور فقري اصلا منه لله بقى ، معرفش الدكتره دي هتستفيد ايه لما تسقطنا وربنا .